Microsoft Threat Intelligence حذرات من استعمال أدوات ديال الذكاء الاصطناعي agentique فهجمات كاتستهدف القطاع المالي. فالتقرير اللي تنشر نهار 6 نونبر 2026، قالت Microsoft باللي المجموعة اللي كاتتبعها باسم Storm-3358 بدات فشهر أكتوبر كتستهدف منظمات مالية باستعمال ARTEX، وهو framework هجومي كيقدر يأوطوماتيزي عدة مراحل من الاختراق.
Microsoft كتوصف Storm-3358 بأنها مجموعة ديال الاختراق متمركزة فكمبوديا والدافع ديالها مالي. كتركز بالأساس على مؤسسات مالية فجنوب شرق آسيا، ولكن استهدفت حتى عدد محدود من المؤسسات المالية الكبيرة فمناطق أخرى من العالم. فالعمليات اللي تلاحظات، ARTEX تخدم مع أدوات أوتوماتيكية كلاسيكية باش تقلب على سيستيمات محلولين على الإنترنت، تستغل الثغرات، وتركب برامج ديال الولوج عن بُعد.
من بين الثغرات اللي تذكرو كاين upload ديال الملفات بلا تحقق، وSSRF، وهي تقنية كتخلي السيرفر يدير requêtes ما كانتش مقصودة. من بعد الاختراق، استعملو المهاجمين RATs open source بحال WISP وvshell وAdaptixC2 باش يبقاو داخل السيستيمات المتضررة ويتحركو فيها. Microsoft لاحظات حتى agents ديال ARTEX كايستعملو netcat وcurl باش يحمّلو هاد الأدوات فالماكينات المخترقة.
الـIA agentique ما كاتخليش الهجوم سحري، ولكن كاتسرّع بالخصوص التنفيذ وتسلسل المهام. حسب Microsoft، هاد agents يقدرو يجربو بزاف ديال requêtes فمدة قصيرة، يعاودو variants مختلفة، يديرو scans، يقلبو على identifiants، يجربو brute force، يحصيو API، ولا يخرجو معلومات من قواعد البيانات. فشركة كبيرة، هاد السرعة كتقدر تصعب الخدمة على فرق السيبرسيكيوريتي.
باش يتكشف هاد النوع ديال النشاط، Microsoft كتنصح بمراقبة موجات ديال requêtes مختلفة فمدة قصيرة، وsignatures الافتراضية ديال أدوات بحال Nmap وcurl وwget وPlaywright وPython HTTP clients، وزيد عليهم السلوكات المشبوهة فالسيرفرات والـpostes. كتنصح حتى باستعمال decoys وhoneypots وtarpits باش يضيعو أو يبطؤو agents المستقلين. البنيات التحتية اللي ذكرتها Microsoft كانت ما زالت ناشطة نهار 6 نونبر 2026، ولكن الاعتماد على IP بوحدها ما كافيش حيث المهاجمين يقدرو يبدلوها باستعمال proxies ولا VPN.
